الله معك...



بيخبّرو عن ملك طلب من طبّاخ القصر إنّو يحضِّرلو أطيب وألذّ أكلة بالدني، حضَّرلو الطبّاخ طبق لسانات شهي جدًّا.

بعد فترة طلب الملك من نفس الطبّاخ يحضُّرلو أسوأ أكلة بالعالم، وشو كانت الصدمة كبيرة لمّا قدَّملو طبق لسانات.

إستفسر الملك من الطبّاخ :

«كيف ممكن يكون اللسان أحسن وأسوأ أكلة بنفس الوقت»؟ 

جاوب :

«مولاي طال عمرك، اللسان إذا إستعملتو منيح بيكون أحسن شي، وإذا إستعملتو للشرّ بيكون الأبشع والأسوأ».




الزوّادة بتقلّي وبتقلَّك :


اللسان مراية بتعكس صورة الإنسان يلّي عَم يحكي، خلّينا نستعمل لساناتنا للكلمة الحلوة يلّي بتطيِّب الخاطر بتبني ولا مَرَّة بتهدم، خلّينا نطلب من الربّ إنّو يكون حارس على ألسنتنا لحتَّى نكون عَم نسبّحو ونعلُن مجدو لكلّ الناس، والله معك.

المصدر : صوت المحبّة