الله معك...


بيخبّرو عن مزارع كان عَم بيعاني من مشكلة، كلّ ما يزرع الأرض ذرة، بتجي مجموعة من الطيور وبتاكِلّو البذار وبتخرِّبلو كلّ شِغلو، لَبيوم من الإيَّام قرَّر ينصب شبَك ويلقَط كلّ هالطيور، وساءبت يوم يلّي قرَّر كان في طير بحري طاير لحالو، بيلتحق بسرب هالعصافير وبيوقع بالشبَك.

ولمّا بيجي المُزارع ليتفقَّد الشبَك بيشوفو، وبيبلِّش هالطير يتوسَّل المُزارع ويقلّو :

«أنا ما باكُل ذرة، أنا بسّ باكل سمَك».

بس المزارع قاطعو وقَلّو :

«يمكن كلّ يلّي عَم بتقولو صحيح، بسّ مع الأسف مسَكتك مع سرب الطيور المُضرَّة لمحاصيلي وأكيد مصيرك رح بيكون متل مصيرُن، يعني الدبِح».




الزوّادة بتذكِّرني وبتذكّرك :


بالقول المأثور : «قلّ لي من تُعاشر أقُل لكَ مَن أنت». 

الناس بيحكمو عليك من خلال يلّي بترافقُن.

إنتبه، ما ترافق إلّا الصَّالحين. 

وصاحب المزامير بيقول :

«طوبى للرجل الَّذي لا يسلك في طريق المُنافقين»، والله معك.

المصدر : صوت المحبّة