الله معك...


بيخبّرو عن رِجّال كان عم بيفتِّش بشوارع كاليفورنا عن بقايا أكل، داخل برميل الزبالة، بهدف يلاقي بقايا أكل لحتَّى يسدّ جوعو.

خلال التفتيش بيلاقي هالمتشرِّد شنطة متروكة حَدّ الحيط، بيفتحها بيلاقي فيها مبلغ ٤٠ ألف دولار.

رغم حاجتو لـ ١٠ دولار لحتَّى ياكُل ويسِدّ جوعو، وبالرغم من حالة الفقر يَلّي عَم بيعيش فيها، قرَّر يروح على مركز الشرطة ويسلِّمُن الشنطة والمصاري يلّي بداخلها.

حاكِم كالفورنيا، وتقديراً لأمانة هالرِجّال قرَّر ينظِّملو حملة لمدِّة أسبوع، بختام الحملة بلغت قيمة التبرُّعات يَلّي قُدِّمت حوالي ٨٥ ألف دولار، يعني أكثر من ضعف المبلغ اللي عثر عليه بالشنطة حَدّ الحيط.




الزوّادة بتقلّي وبتقلَّك :


الأمانة نعمة من ربّنا، ما في إلها علاقة لا بظروفنا ولا بإحتياجاتنا، خلّينا نحافظ على أمانِتنا لأنّو بيوم اللقاء رح نسمع صوت الربّ عَم بيقلّنا :

«طوبى لإلكن كنتو أمناء على القليل تفضَّلو كونو أمناء على الكتير» والله معك.

المصدر : صوت المحبّة