الله معك...


بيخبّرو إنّو بمدينة كاليفورنيا، تمّ إفتتاح معرض لبَيع السيّارات من خمس طوابق.

بهالمتجر ما بيحقّ للزبون الدخول إلّا مرَّة وحدة ليختار سيَّارتو بلا ما يدفع ولا دولار، وما بيحقلّو يرجع أبدًا لَوَرا.

وُصِل رجَّال على أوَّل طابق، شاف مكتوب على الباب :

«عِنّا سيَّارات وفّيرة آخر موديل». 


بيقرِّر يطلع على الطابق التاني بيلاقي مكتوب :

«عِنَّا سيَّارات وفّيرة آخر موديل عائليِّة». 

بيقرِّر يطلع على الطابق التالت، بيلاقي مكتوب على الباب :

«عنَّا سيَّارات وفّيرة آخر موديل، عائليِّة، وكمان عنَّا سيَّارات سبور».

بيقرِّر يطلع على الطابق الرابع بيشوف مكتوب على الباب :

«عنَّا سيَّارات وفّيرة آخر موديل، عائليِّة وكمان عنَّا سيَّارات سبور وفُول أوبشِن». 


بيقرّر يفوت إنّما بينغرّ وبيقرِّر يطلع على الطابق الخامس، بيلاقي مكتوب :

«أهلاً وسهلاً، إنتَ الزائر رقم ٨٥٠ لليوم يلّي بيوصل على هالطابق، سيَّارات ما في عنّا إنَّما وُجِد هالمتجر بطوابقو الخمسة مع كلّ شروطو لنأكِّد إنّو الإنسان ما في عندو قناعة، شُكرًا لزيارتك إذا ممكن تنتبه لخطواتك إنت وفالِل».




الزوّادة بتذكّرني وبتذكّرك :


بالقول الشعبي يلّي بيقول إذا بدَّك تحيِّر الإنسان خيّرو، إذا وُضِعت أمام أيّ خيار لازم يكون عندك قناعة، وتذكَّر على طول القناعة كنز لا يفنى، والله معك.

المصدر : صوت المحبّة