زوّادة يوم ٣٠ كانون الأوَّل ٢٠٢٤ - خدّام الربّ

الله معك...


قرَّب موعد التلاميذ مع الإستاذ يلّي كتير بيحبّوه وبينطرو ساعتو، وكان هالإستاذ يطرح عليهن ع طول مواضيع جديدة ليناقشها معُن.

ولـمّا فاتو ع الصف وبلَّشِت الحصَّة، شافو ورقة بيضا كبيرة عم بتغطّي اللوح، طلب الإستاذ من كل تلميذ يرسم صورة الشخص يلّي بيحبّو أو بيكرهو، وهيك صار.

وحدو عماد، بعد تفكير كتير طويل، رسم صورة الإستاذ بمنخارو الطويل وعويناتو السماك.

أخد الإستاذ الصُوَر وعلَّقهُن ع الورقة البيضا وطلب من كلّ تلميذ، يرمي الصورة يلّي بيكره صاحبها بسَهم.

وهيك، كانت الضحكات والصيحات عم تعلا شوي شوي. 

وشو كانت دهشتُن كبيرة، لـمّا الإستاذ شال الورقة يلّي غطّا فيها اللوح، وبيّنت تحتها صورة الرب يسوع. 

وإنصدمو أكتر، لـمّا شافو سهامن كيف إخترقت وِجّ وعيون يسوع من كلّ مطرح... هون تأثَّرو وفِهمو الدرس والمتيلة. 




الزوّادة بتدعيني وبتدعيك :

تنعيش المحبِّة لأبعد حدود وما نعمل للآخرين إلّا يلّي منرغب إنّو هنّي يعملوه لإلنا، زراع الحب بيفرّخ السلام... والله معك.

المصدر : صوت المحبّة