الله معك...


بيخبّرو عن تنَين رجال كانو فاتحين دكّانتَين حَدّ بعض، الأوَّل بيبيع خلّ والتاني بيبيع عسل. 

كلّ الناس كانو يشترو من عند بيّاع الخلّ وما حدا يشتري من عند بيّاع العسل. 

فكَّر بيّاع العسل وقال :

«يمكن غلا العسل هوّي يلّي عَم بيبعِّد الناس عنّي، لازم رخِّص السعر حتَّى يصير متساوي مع الخلّ».

هيك صار، بس ضلّو الناس يشترو من محل الخلّ وما حدا يجي لعندو.

قرَّر يزور صديقو لحتَّى يفهم شو السرّ، بركي بيلاقي حلّ لمشكلتو، سأل جارو بيّاع الخلّ :

«ليش الناس على طول بيتجمَّعو عندك مع إنّو الخلّ طعمو بشع وريحتو كريهة، أنا ببّيع العسل ريحتو حلوة وطعمو طَيِّب، وما حدا بيِجي لعندي؟»

جاوبو :

«بكلّ بساطة أنا ببّيع الخلّ بلسان من عسل وإنتَ بتبيع العسل بلسان من خَلّ». 




الزوّادة بتقلّي وبتقلَّك :


لسانك حصانك إن صُنتَه صانَك وإن خُنتَه خانَك، لازم أنا وإنتَ نفكّر إنّو بالكلام الحلو منقدر نحتلّ الممالك والقلوب يلّي ما منقدر نحتلّها بكلّ أنواع الأسلحة، والله معك.

المصدر : صوت المحبّة