الله معك...



بيخبّرو عن صبي زغير خلال صفّ التعليم المسيحي كانت المعلّمة عَم تشرحلُن الوصايا، توقّفت عند وصيّة «أنا هو الربّ إلهك لا يكُن لك إله غيري». 


إستطردت المعلّمة بالشرح وقالتلُن :

«ما لازم تتعبَّدو لحدا وإلّا بتكونو عَم تعبدو أصنام».

الصبي كتير تأثَّر بكلام المعلّمة، لمّا رجع على البيت قالتو إمّو : 

«يا تقبرني إشتقتلّك يا ريت بتعرف قدّيش بحبَّك لدرجة إنّي بعبدك».

تطلَّع الصبي بإمّو وقلّها :

«ماما ما لازم تحبّيني للعبادة، وإلّا بصير صنَم، لأنّو العبادة للربّ والباقيِّة يلّي منعبدُن بيكونو أصنام».




الزوّادة بتقلّي وبتقلَّك :


قدّام براءة هالطفل يمكن نبتسم، بس كمان لازم نفكِّر قدَّيش بهالإيام عَم نكون صنَمِيّين وعَم نتعبَّد لأمور أرضيِّة بعيدة كلّ البُعد عن الربّ.

خلّينا نتذكَّر إنّو الربّ حبّنا لدرجة بذل ذاتو كرمالنا ورفعنا من درجة البُنوِّة لدرجة الألوهة، والله معك.

المصدر : صوت المحبّة