الله معك...

خلّينا أنا وإنتو اليوم نفكِّر مِين مِنّا قادر يغيِّر ماضيه؟ أو قادر يصلِّح غلطة عملها مبارح؟

أكيد فينا نعتذر عنها بس ما فينا نمحيها!

ما فينا مثلاً نمسح دمعة حدا بكّيناه من جمعة!

يمكن إعتذرنا، بس وين منروح بجمعة زعل وبكي؟

أو نشيل وجع حدا ضربناه كفّ بلحظة غضب؟

كمان يمكن منعتذر، بس إعتذارنا ما بيشيل مطرح يلّي علَّم أحمر وبيكون الشخص انوجع؟

أو نمحي إهانة قلناها لشخص؟ 

إعتذارنا ما بيرجِّع كرامة الشخص يلّي انهان، كلّها مواقف صعبة منمرق فيها وأوقات بتأثِّر عَ حياتنا كلّها.




الزوّادة بتقلّي وبتقلَّك :


إنو ضعفنا البشري وعدم قدرتنا على محي الماضي مَنُّن إلّا مساحة تَ يشتغل فيها يسوع المسيح.

هوّي يلّي بيمحي الماضي كأنّو ما كان، هوّي يلّي محبّتو ما بيحِدّها وقت، لا مستقبل ولا حاضر ولا ماضي.

هوّي يلّي قادر يخلّينا نبلِّش من جديد ويفتحلنا صفحة بيضا بسِجِلّ السما، والله معك.

المصدر : صوت المحبّة