الله معك...


بيخبّرو عن بَيّ بَدّو يعلِّم إبنو القناعة، و شو هيّي فضيلة القناعة.

بيُطلُب مِنّو ينزل عالجنينة يقطف أحلى وردة و يِجي. 

راح هالصبي، طوَّل كتير تَ رِجِع، ومش بس هيك، رجع ما معو وردة.

سألو البَيّ عن السبب، جاوب الإبن :

«نزِلِت، نبَّشِت، لقِيت أحلى وردة، بس ما قطفتها، قلت أكيد في أحلى منها، وقعدت فتِّش وفتِّش، آخر شي ما لقيت وردة أجمل منها، وبس رجعت تَ أقطفها وجبلك ياها ما لقيتها».




الزوّادة بتقلّي وبتقلَّك :


نحنا هيك بالحياة، ما منقنع بالوزنات يلّي عطانا ياهُن الربّ، بيضلّ عنّا رغبة بالحصول على الأكتر والأفضل.

منقضّي العمر نحلم ونتأمَّل الخيرات الموجودة عند الآخرين، منحرق العمر نشتهي شو في عندُن، وما منعرف نستفيد من الوزنات يلّي الربّ عطانا ياهُن. 

خلّينا نكون متل هالشبّ نفهم دروس الحياة، نقنع بِ يَلّي عطاه الربّ لإلنا، نتاجر بوزناتنا منربح بهالدني وبالآخرة، والله معك.

المصدر : صوت المحبّة