الله معك...


بيخبّرو عن مملكة كان فيها متصوِّف مشهور بحكمتو، كان الملك يستشيرو قبل ما ياخد أيّ قرار.

بيوم من الإيّام، أهداه الملك كعرفان جميل مقصّ دهبي مرصَّع بالجواهر.

رفض المتصوِّف المقصّ، وطلب يعطيه بدَل مِنّو إبرة.

تعجَّب الملك من هالطلب الغريب، بس المتصوِّف بيقطعلو حبل أفكارو وبيقلّو :

«قضَّيت كلّ حياتي عَم حاول كون صديق كلّ الناس، شارِكُن كِلّ أفراحُن وأحزانُن، خايف ما هالمقصّ لو كان مدهَّب ومرصَّع بالجواهر يخلّيني إقطع نسيج الصداقة والمحبِّة يَلّي بتجمعني بالناس، بس الإبرة بتصلِّح كلّ يلّي كان مقطوع بترمِّم كلّ الروابط، بإختصار الإبرة بتلخِّص مشروعي بالحياة».




الزوّادة بتدعيني وبتدعيك :


حتَّى نفكِّر كَمّ مرَّة بالحياة منكون متل المقصّ، عَم نقطع الروابط يلّي بتجمعنا بالآخرين وبتحوِّلُن من أصدقاء لأعداء، وكَم مَرَّة منكون متل الإبرة منرمِّم كلّ شي صار بالي ومنرجِّعلو جمالو الأوَّل، والله معك.

المصدر : صوت المحبّة