الله معك...



بيخبّرو عن رجل أعمال، بنهاية يوم عمل، هوّي وضاهر من مكتبو بيركض لعندو شحّاد وبيطلب منّو يعطيه ليرة لحتَّى يشتري فنجان قهوة.

الرِجَّال بكلّ كرم ومحبِّة بيعطيه ١٠ ليرات وبيقِلّو :

«بدَل الليرة هيدي ١٠، وبدَل الفنجان فيك تشتري ١٠ فناجين قهوة».

باليوم التاني، كان رجل الأعمال ضاهر من شغلو بيركض الشحّاد وبيقلّو كلام قاسي، بيسألو رجل الأعمال :

«ليش عَم تتصرَّف معي هالتصرّف»؟

ردّ الشحّاد : «مبارح طلبت مِنَّك ليرة عطيتني ١٠ ليرات وقلتلّي إشتري بدَل الفنجان ١٠، عملت متل ما قلتلّي وما نِمت كلّ الليل».



الزوّادة بتقلّي وبتقلَّك :


بس تتلقَّى مساعدة من حدا لازم تعرف تستفيد منها، ما تصرفها بطريقة غلط، وتحمِّل مسؤوليِّة غلطك للآخرين، تذكّر القول المأثور : ما تشرب بالبير وتكبّ فيه حجر، والله معك.

المصدر : صوت المحبّة