دكّانة الربّ
09Oct
الله معك...
بيخبّرو عن مَرا شافت بالمنام إنها موجودة بدكّان، والغريب إنّو الربّ هوّي صاحب الدكّان، قرَّبِت مِنّو وقالت بدهشة وفرح كتير كبير :
«يا ربّ هيدا إنتَ أو أنا عَم غلِّط»؟
جاوب الربّ :
«نعم هيدا أنا هوّي الربّ».
سألت المرا :
«وشو ممكن إشتري من عندك»؟
جاوب الربّ :
«يلّي بدِّك ياه، كلّ شي عندي موجود».
قالت المرا :
«إذا بتسمح بترجّاك عطيني السعادة، والصحة، والنجاح وكتير كتير من المال».
إبتسم الربّ، راح على المستودع وبعد وقت قليل رجع ومعو مغلَّف زغير، سألت المرا بخيبة أمل :
«هيدي هيّي الطلبيِّة»؟
جاوب الربّ :
«يمكن ما بتعرفي إنّو هون ما منبيع إلاّ البذار».
الزوّادة بتقلّي وبتقلَّك :
السعادة، والصحَّة، والنجاح هنّي بذور الربّ، بيزرَعُن بحياتنا، ونحنا لازم نعتني فِيُن حتَّى يكبرو ويعطو ثمار، وهالثمار بتدوم للأبد، والله معك.
المصدر : صوت المحبّة
تعليقات
