الله معك...


بيخبّرو عن القدّيس شربل إنّو بليلة من ليالي البرد والشِّتي، كان عَم بيعاني من وجع بمعدتو. 

بيقلّو رفيقو بالمحبسة الأب مكاريوس إنّو يخلّيه يغليلو أعشاب تخفِّفلو أوجاعو.

قِبِل القدّيس شربل، شرط إنّو ما يحطِّلّو فِيُن سكّر، قلّو الأب مكاريوس :

«الأعشاب فِيُن مرورة ما بينبلعو بلا سكّر».

جاوب مار شربل :

«ما بيحقِّلّي إتلذَّذ بطعم السكّر ومعلّمي يسوع المسيح شرب خلّ عالصليب بأكتر وقت وجَعو وعطشو».




الزوّادة بتقلّي وبتقلَّك :


نحنا اليوم قدَّيش عَم نعمل إماتات، ونفكِّر بيسوع وعذابو، ونتخلّى عن إشيا منحبّها؟

مين قال إنّو الإماتات بس لوقت الصوم؟ كل يوم فينا نعمل تضحية زغيرة، بتكبر عند ربنا وبتكون خطوة زيادة صوب السما، والله معك.

المصدر : صوت المحبّة