الله معك...


بيخبّرو عن فلاّح عندو حمارَين واحد حمَّلو عَ ضهرو ملح والتاني حمَّلو طناجر وصحون فاضيين. 

مِشيو هالحمارَين، اللي حامل الملح تعب لأنّو حملو كان أتقل من الصحون الفاضية وحسّ حالو رح يوقع.

بالطريق بيوصلو عَ بُحيرة مَيّ، فكَّر اللي حامل ملح ينزل يغطِّس حالو بهالميّات تَ يبورِد ويقدر يكمِّل طريقو بنشاط.

نزل بهالبحيرة وطلع منّها نشيط لأنّو المِلحات دابو وخَفّ حِملو. 

قام التاني غار وصار بدّو يعمل متلو.

نزل بالبحيرة، الطناجر والصحون اللّي محمَّلُن عَ ضهرو تعَبّو مَيّ وصار حِملو أتقل، طلع من البحيرة موجوع ومش قادر يمشي.



الزوّادة بتقلّي وبتقلَّك :


ولا مرَّة تفكِّر إنّو يلّي بيفيد غيرك ممكن يحمل نفس الإفادة لإلك، كرمال هيك لا تقلِّد غيرك ولا تشتهي مقتنياتو، شكور الله على النِعَم يلّي عطاك ياها، والله معك.

المصدر : صوت المحبّة