الله معك...


بيخبّرو عن رجّال كتير غني، بس مع الأسف كتير بخيل.

بيوم من الإيَّام بيقرِّر يتكارم على حالو، بيشتري قطعة حلوى وكان حاملها ومبسوط فيها، بس مع الأسف بتوقع على الأرض وبتنتِلي تراب.

بيحملها بحزن، وهوّي وماشي على الطريق بيلتقي بشحّاد، بيطلب مِنّو حسنة بيعطيه قطعة الحلو يلّي كلها تراب.

بالليل بيبصر بمنامو إنّو بمطعم فخم جدًا وهوّي كتير جوعان، بيندَه لأوّل خادم وبيطلب منّو شي لياكلو، الخادم بيفلّ والغني بيضلّ ناطر، بيطلب من التاني والتالت، وبعد وقت طويل بيتقدّم مِنّو أحد الخدم وبيقدّملو قطعة حلو كلّها تراب، بيقلّو :

«معقول رِجّال غني مِتلي بتقدّملو هيك أكل»؟

بيرِدّ عليه بكل إحترام :

«بعتذر إنت بمطعم الملكوت، وهون ما منقدّم لضيوفنا إلّا يلّي بيكونو هنّي بدورُن قدّموه لغيرُن على الأرض».





الزوّادة بتقلّي وبتقلّك :


ما تكنز لإلك كنز على الأرض، خلّي كنزك بالسما وتذكّر محلّ ما بيكون كنزك هونيك بيكون قلبك، والله معك.

المصدر : صوت المحبّة