الله معك...



كتبت الأمّ تريزا هالوصايا على حيط بيت من بيوت الأطفال بمدينة السلام كالكوتا بالهند وقالت :

«كتير أوقات بيتصرَّفو الناس تصرُّف أناني وبدون تفكير ومنطق... لازم نحنا نُغفُرلُن.

إذا كِنَّا مناح وأصحاب قلوب طيبة، يمكن يقولو عنَّا بسطاء لحدّ الغباء، لازم نضلّ مناح وما نتغيَّر.

إذا كِنَّا ناجحين بحياتنا، يمكن في ناس يصيرو أصحابنا ويتقرَّبو مِنَّا عن مصلحة وغاية، ويمكن ناس تانيّين يغارو مِنَّا ويصيرو أعداءنا، بس نحنا لازم نجتهد لنكون ناجحين.

إذا كِنَّا صادقين وصريحين، يمكن كتار يستفيدو من هالشي تَ يبيّنو أحسن مِنَّا ويبيّنونا غلطانين مع إنّو نحنا على حقّ، هيدا كِلّو ما بيمنع نكون صادقين وصريحين.

يلّي بنِيتو بسنين طويلة، يمكن يدمّرو شخص بليلة وحدة... على كلّ حال كمِّل تعمِّر. 

الخير يلّي عَم تعملو اليوم، يمكن ينسوه الناس بكرا وما يقدّرولكُن جميلكن... على كل حال كمّلو عملو خير».



الزوّادة اليوم بتذكِّرنا :


بكلام الكتاب المقدّس يلّي بيقول :

«خلّي كل أعمالنا تكون لمجد الله، ولا مَرّة ننتظر مكافأة من أهل الأرض، لازم عملنا يكون بالخفاء وبيّنا يلّي بالسماء بيكافينا».

خلّينا نعيش السعي الدايم لحتَّى يتمجَّد الربّ على طول من خلال كلّ الأعمال يلّي منقوم فيها على الأرض، والله معك.

المصدر : صوت المحبّة