ربّي يسوع، شو حلو الصباح اللي بيبدا بكلامك عم تأكّدلي متل ما عم تأكّد للتلاميذ الـ ٧٢ إنّو أسماءنا مكتوبة بالسما.
سألت حالي ليش إسمي مكتوب عندك بالسما، مع إني دايماً عم بوقع بضعفي وبخطيتي؟
بلاقي الجواب بكلامك لمن بتقلي ملكوت السما فيي، أنا إبنك وبنتك، أنا اللي إخترتني تا عيش الفرح فيك، رغم كل الحواجز الصعبة اللي بيحطلي ياها الشيطان تا يزرع فيي عدم الثقة بي إنّك بتحبّني وبتسامحني.
بشكرك بهالنهار وبسبّح الروح القدس اللي دايما بينوّرلي دربي معك وبيرافقني وبيعلّمني كيف عيش الفرح معك وفيك يا رب.
هالروح القدس اللي ما بيتعب وما بينام، دايماً حاضر ومتأهّب تا يضلّ عم بيوجّهلي أفكاري وأقوالي صوبك تا أقدر أعكس صورتك لكل إنسان وكون عم أعرف دوس عالخطية وعيش الإستعداد للقاءك والفرح الدايم معك.
/الخوري يوسف بركات/
