خلاصة انجيل اليوم بأحد الابرار والصديقين هي "انجيل العمل" وهي خلاصة الانجيل كله:"جُعْتُ فَأَطْعَمْتُمُونِي، وعَطِشْتُ فَسَقَيْتُمُونِي..."
تحرير الانسان من العوز هو مفتاح الملكوت. وممكن يكون العوز العاطفي والمعنوي أشد وأصعب من العوز المادي.
البار والصديق بيعرف أنو اللي بيعطي من قلبه ثوبه الوحيد ما رح يكون عريان... واللي بيعطي آخر لقمة من صحنو ما رح يجوع، واللي بيسقي من كبايتو اخر نقطة مي ما رح يعطش..بيعرف أنو اللي بيساوم ع كلمة الله بيساوم ع كل شي... واللي بيحترم كلمة الله ولو كانت متل حد السيف إلو كل شي...بيعرف إنّو المستحيل ما آلو مطرح عند اللي بيتكلوا ع الله..البار والصديق بيعرف إنّو اللي بيفتش يكون دايماً بالصدر ما خرجو يكون "زلمة" الله...واللي بيشتغل لمجدو الذاتي متل اللي بيزرع قمح عالصخر بيكون متل عشب السطوح بيطلع الصبح بكير وبيبس عند غياب الشمس...بيعرف إنّو المسؤول مش لازم يكون "بوليس" بينخاف منو وإلا بتصير الكنيسة حبس كبير... والمسؤول من دون تقوى وصلاة متل أرض صحرا ما بتشوف لا شمس ولا مي...
واللي بيحط كل شي بإيد الله بيلاقي إيد الله بكل شي...البار والصديق بيعرف إنّو القداسة خيار بسيط وقرار بسيط مش شارات ورايات وامتيازات.... والحق بيكون ضعيف بإيد مالك المال وبيكون قوي بإيد مالك الحق....
والحقيقة بإيد الضعيف والمسكين أقوى من الكذبة بإيد القوي صاحب السلطة والمال...البار والصديق بيعرف انو المسؤول ببيّن مسؤول بوقت الشدة، ما بيتخبى ورا حدا ولا بيتخلى عن حدا ولا بيترك محلو للأصغر منو...
والمؤسسة اللي فيها مسؤول ما بيتحمل مسؤولية متل سفينة من دون ربَّان بتسير باتجاه الغرق...البار والصديق بيعرف يموت عن هالدني تيعيش السما بهالدني..
أحد مبارك
/الخوري كامل كامل/
