بصبّحك يا ربّ بهالنهار المبارك مع العدرا مريم سيدة الحصاد اللي عم نعيِّدلا عيدا اليوم.


منسمعك يا ربّ عم بتأكِّد للناس إنّو كلّ إنسان بيسمع كلمتك وبيعمل فيها بيكون من عيلتك.


كيف ما رح تكون العدرا مريم إمّك يا ربّ؟

هالإنسانة اللي سلَّمِتَك ذاتا تا تحلّ فيها وتتجسَّد وتصير إنسان متلنا وتعيش بيناتنا وتباركنا.


كيف ما رح تكون العدرا مريم تلميذتك الأولى يا ربّ؟

هيي اللي سمعت كلامك وعملت فيه وتتلمذت عا إيديك ولحقتك من مكان لمكان تا تتأمَّل فيك وبكلامك الإلهيّ.


وكيف ما رح تكون العدرا مريم إمّنا يا ربّ؟

هيي اللي حبّيتا ونقّيتا من من بين كلّ النساء ودعيتا تا تكون إمّنا وشفيعتنا.


لهيك نحنا كلّ يوم منكرّمك يا مريم، يا إمّ الله وإمنا، ومنسلّمك، بالإضافة إلى عائلاتنا، بيوتنا ومزروعاتنا وحصادنا، تا تباركيهن وتحمينا من كل الأضرار.

/الخوري يوسف بركات/