كلّ التسبيح وكلّ التمجيد وكلّ الشكر إلَك يا إله الكون وخالق السما والأرض وكلّ اللي فيها.

لوين بدنا نروح يا ربّ وإنتَ الملجأ الوحيد لكلّ إنسان بيآمِن فيك، وعندك بيلاقي الراحة الحقيقيِّة؟


و حول مين غيرك يا ربّ بدنا نجتمع وكلّ الكلام المُفيد والبيرَيِّح والجذّاب ما بيطلع إلَّا مِنَّك؟

شو في أجمل وأعذب من كلامك يا ربّ لمَّن بتدعينا للمحبِّة والمغفرة والتسامح والعطاء والخدمة؟


شو في أطيب وألذّ من جسدك ودمك، يا ربّ، اللي عطيتنا ياهن زاد وزوّادة برسالتنا وبطريقنا للملكوت؟


ومين اللي قادر يعطينا السلام والطمأنينة والرجا بوقت الصعوبات غير روحك القدّوس المُعزّي اللي بيمَلّينا ثقة إنَّك ما بتتركنا نضيع بمتاهات هالعالم المليان شرّ.


بس كمان، منسمعك عم تسألنا السؤال الأهمّ وهوّي : ويننا من التسليم الكُلّي لإلك؟

لهيك، رح نسعى دايماً إننا نُصغي لكلامك ونعمل فيه.

/الخوري يوسف بركات/