منرفعلك كلّ التسبيح والمجد والإكرام يهالصباح المبارك يا إله المحبِّة والرحمة يسوع المسيح.

كتير من الأوقات منكون متل هالإنسان صاحب الوزنة الواحدة اللي ما عِرِف أو حتَّى ما قِبِل يتاجر فيا.

منصير نفقد صبرنا، ومنبلِّش نتضايق من أقلّ شي بيصير معنا، ومنفقد صبرنا بهالحياة وخاصَّةً بالأوضاع الإقتصاديِّة والإجتماعيِّة والمعيشيِّة الصعبة اللي بتأثِّر على حياتنا الروحيِّة معك.

وبدل ما يكون عنَّا الرجا فيك يا ربّ، ونكون متأكدين من حضورك فينا وحملك لكلّ مشاكلنا، منصير نتأفَّف عالوضع ومننسى العقل اللي عطيتنا ياه تا نفكِّر من خلالو نمشي بطريقك طريق الحقّ.


بس تا نقدر نكون معك يا ربّ، عم نجرِّب نفهم ونتأكَّد إنّو هالوزنات اللي عاطينا ياها، على أنواعا، ما فينا نتركا من دون تفعيل، لازم وعلينا المسؤوليِّة، كأبناء وبنات الملكوت، إننا نستثمِرا فعل حُبّ وعطاء وتحضير للقاءك.


إلك مِنّا كلّ الشكر عا نِعَمَك وعطاياك بحياتنا اللي بتنوِّرا بنورك يا ربّ.

/الخوري يوسف بركات/