منسبّحك يا ربّ ومنمجّدك ومنباركك بهالصباح ومنتمنّى تكون نهاية حياتنا الأرضيِّة الزايلة هيّي بداية لحياة جديدة أبديِّة معك بالملكوت السماوي.


يا ريتنا منعرف منيح ومنتأكَّد قدَّيش حبّيتنا وبعدك بتحبّنا نحنا ولادك لدرجة إنَّك عطيتنا ذاتك وإفتديتنا بموتك عالصليب كرمال تمحي عنّا عار الخطيِّة، أكيد كِنَّا ما منزعلك بأقوالنا وأفعالنا يا يسوع الحبيب.


إنتَ اللي بكيت عا أورشليم، بكيت لأنَّك شفت قدَّيش الإنسان بِعِد عنَّك وعن تعاليمَك وبعدو عم يبعد بسبب طَيشو وحِقدو وعبادتو للمال وحُبّو لذاتو وتفضيلا عليك.


إنتَ اللي كان بدَّك يانا نعرف حقيقة رحمة الله لإلنا، وبدَّك يانا نكون أداة حُبّ وفرح الله لكلّ إنسان منلتقي فيه، وبدَّك يانا نزرع سلامك بالعالم اللي عايشين فيه، وخاصَّةً بوطننا اللي، يوم عن يوم عم يفقد سلامو.


إنتَ اللي بدَّك يانا نكون رسالتك بالمجتمع اللي موجودين فيه، رغم الظلم والقهر والإضطهادات غير المباشرة من الشرّير اللي عم نواجِها، وعم تدعينا نثبَت بِحُبنا لإلك، ونساعد الآخرين على العودة والثبات فيك.

/الخوري يوسف بركات/