مع نهاية هالأسبوع المبارك، منرفعلك يا ربّ قلوبنا وعقولنا وأفكارنا فعل تسبيح وشكر عا كلّ نِعَمَك وعطاياك اللي بتفيضا علينا بكلّ لحظة.


شو هالتعليم الصعب اللي عم بتعلِّمنا ياه يا ربّي يسوع؟

كيف بدنا نحبّ اللي إذيونا واللي ما بيحبّونا؟

كيف بدنا نغفر لَيَللي عم يضطهدونا بسبب تواضعنا وبساطتنا؟

شو صعب علينا نسامح ونحبّ ونبارك اللي كتير من الأوقات بيحاولو يجرّحو فينا ويحطّمونا يا ربّ؟

هودي كِلُّن صعبين وما بينحملو إذا كِنَّا متِّكلين عا قوانا الذاتيِّة الشخصيِّة، بس نحنا ولادَك وتلاميذَك يا ربّ، وبدنا نكون على مثالك، نعرف نحبّ ونسامح متل ما إنتَ حبَّيت وسامَحت كلّ اللي جرحوك واللي قتلوك.


نعم يا ربّ، إنتَ اللي بتشرق كلّ يوم نور رحمتك ومحبتك وحنانك عا كلّ إنسان وخصوصي الضعاف بالإيمان ، كيف رح تكون وجوهنا وأجسادنا عاكسة نور حُبَّك عالعالم؟


ما في أجمل من إننا نسلّمك ذاتنا تا نقدر نعيش بقلبك وتكون حياتنا عم تعكس نور حُبَّك يا ربّ.

/الخوري يوسف بركات/