مع إنطلاقة هالزمن المبارك، منعلنك يا ربّ إلهنا ومُخلِّصنا ومنرفعلك كلّ التسبيح والتمجيد.


إنتَ يا ربّ نور هالعالم، خلقتو بكلمتك، وجيت وتجسَّدِت فيه وصُرت إنسان تا تقضي عالظلام اللي عم بيحاول يلفّ هالعالم ويمحي النور اللي فيه.


إنتَ يا ربّ، نور العالم، نزلت عا أرضنا تا تشيلنا من وحل الخطيِّة ومن ظلمة العالم وترفعنا لعندك مطرح النور الأبديّ اللي ما بينطفي.


إنتَ يا ربّ اللي دعيتنا تا نكون نور العالم، وكلّ هدفك إنَّك تخلِّص العالم من خلالنا، نحنا اللي حبَّيتنا وعطيتنا ذاتك.


بس نحنا فضَّلنا الخطيِّة عالسلام، يا ربّ، فضَّلنا الظلام عالنور، ورفضنا إنَّك تتدخَّل بحياتنا، ونبقى عايشين بعتمة خطايانا وبشهوات العالم.


إنتَ جيت عالعالم يا ربّ والإنسان هرب، إنتَ حكيت وهوي ما سمِعلك، إنتَ نوَّرتو وهوّي فضَّل يبقى أعمى.


بس نحنا ولادك يا ربّ، بدنا نمشي معك بالنور ونبعد عن فساد العالم، ونثبت فيك تا نستحقّ الملكوت السماوي.

/الخوري يوسف بركات/