بصباح هالنهار المبارك، منرفعلك كلّ التسبيح والتمجيد يا ربّ السما والأرض.


يا يسوع، نحنا منلاقي حالنا قدّام خيارين :

يا منمشي بطريقَك يا ربّ، طريق الخلاص، ومنكون أبناء النور، يا منرفضك ومنرفض تعاليمك ومنكون من أولاد الظلام.


والمُهمِّة مش سهلة، لأننا إخترنا إننا نكون أبناءك وبناتك يا ربّ، وعارفين إننا رح نلاقي إضطهادات كتيرة بالعالم ومن العالم لأنّو العالم تعوَّد عالعتمة.


وشو صعبة عالإنسان العايش بالعتمة إنّو يتغيَّر ويِلحَق النور؟ 

صعبة عليه إنّو يُطلَع عالضو.

هالشي صحيح بس مش مستحيل.

وهيك إنتَ يا ربّي يسوع، يمكن مزعج بِمُتَطَلِّباتك : بتفوت عا حياتنا تا تنقلنا من الظلمة للنور ومن الموت للحياة والقيامة، ونحنا بدورنا منرفض تدخُّلاتَك ومنضلّ عايشين بالموت.


يا ربّ، بالماضي يمكن شوَّهنا صورتك بأفعالنا، وجايين لعندك اليوم تا تصيِّرنا تلاميذ جداد نِعكُس نورك بالعالم.

/الخوري يوسف بركات/