مع إشراقة هالصباح منسبحك ومنمجّدك ومنشكرك يا ربّ السما والأرض.

بطرس اللي حطَّيتو الصخرة وعليها بَنَيت الكنيسة وعطيتو السلطان يحلّ ويربط، عم نشوفك اليوم عم تنعتو بالشيطان وتقلّو يمشي وراك، بعد ما كنت طوَّبتو لمَّن إعترف بألوهيّتك يا ربّ.

من خلال هالكلام اللي حكيتو لبطرس الرسول، شو مهمّ ناخد العبرة إنّو اللي بدّو يتبعك يا ربّي يسوع، عليه إنّو يبقى دايماً وراك، لازم دايماً يكون تلميذك و ولا يوم يتعالى عليك وبيصير بدّو يعلّمك.

مهمِّة كتير نرجع لحالة التلمذة بالرغم من كلّ المراكز اللي نحنا فيها وكلّ المسؤوليّات اللي سلَّمتنا ياها.

متلنا متل بطرس الرسول بتدعينا نمشي وراك ونكون رُسُل حقيقيّين نعرف نوصِّل الناس المؤمنين لعندك.

بدنا نكون متل بطرس والرسل بعد القيامة، تلاميذ حقيقيّين، نعرف كيف نتخلّى عن أفكارنا الخاصَّة ونتبنّى أفكارك.

علِّمنا كيف نتواضع ونتخلّى عن مصالحنا ورغباتنا ونبقى وراك إنت المُعلِّم الوحيد.

/الخوري يوسف بركات/