منرفعلك كلّ التسبيح والمجد والإكرام، بصباح هالأحد المبارك، يا إلهنا الحبيب.

ربي يسوع، ما بعرف ليش الناس بأغلبيِّتن، من بداية الخلق لهلَّق، بيبرمو عالمناصب ومفكرين إنّو بالمراكز المهمِّة بيِحكمو الدني وبيحصلو عالسعادة، وناسيين إنّو المنصب الوحيد اللي بيجلب السعادة هوّي بالتواضع وبالخدمة النابعين من القلب النابض بِحُبَّك.


حُبَّك يا ربّ اللي خلّاك تنزل عن عرشك السماوي وتتواضع وتصير إنسان وتعيش معنا تا تأكِّدلنا إنّو فينا نكون معك، ونحصل عالمركز اللي بيليق فينا كأبناءك وبناتك، شرط إننا نتشبَّه فيك خاصَّةً بالتواضع وبالخدمة والمحبِّة اللي ما إلُن حدود.


ما بعرف ليش دايماً يا ربّ منصير نتحجَّج بضعفنا ومنبعّدك عن يوميَّات حياتنا ونِسعى، ولو عا حساب غيرنا، إننا نحصل عا مركز يخلّينا أهمّ من غيرنا، بس بِنَظَرَك رح نبقى متل ما نحنا وما منقدر نخدعك.

يا إلهنا الحبيب، علِّمنا كيف نعيش المحبِّة الحقيقيِّة إلك ولإخوِتنا.

/الخوري يوسف بركات/