منسبّحك ومنمجّدك ومنباركك يا ربّ بهالصباح المبارك وكلّنا رجا بنهاية أسبوع مليان من فرحك وسلامك.


يا ربّي يسوع، الحياة معك هيّي أهمّ شي بالوجود، وبتستحقّ كلّ ثمن منقدّمو حتَّى لو كان الإستشهاد.


ولمَّن منقدِّملك حياتنا يا ربّ منكون عم نحقِّق ذاتنا فيك.


ونحنا اللي منآمن فيك يا ربّ، هدفنا نتبعك ونكون تلاميذك ورُسُلَك بالعالم، بس المشكلة لمَّن بتوصل القصَّة للخيار بين ذاتنا وبينك، عم نختار ذاتنا وملذّاتنا.


صعبة الخيار يا ربّ قدّام مغريات هالعالم الزايل، لهيك دعيتنا تا نتخلّى عن ذاتنا ونِتبعك.


والتخلّي عن الذات هوّي بذاتو صليب، وهالصليب هوّي اللي بدو يوَصِّلنا للملكوت، شرط إننا نحملو بفرح، مهما كان كبير وبيوجِّع.


وهيدي هيّي رسالتنا، نحنا اللي مآمنين فيك إنَّك إلهنا ومُخلِّصنا، إننا نكون سمعان القيرواني نتقرَّب مِنَّك أكتر وأكتر تا نحمل معك الصليب ونتبعك وتكون إنتَ هدف وغاية حياتنا يا ربّ.


بدنا نتبعك يا ربّ ولو بأصعب الظروف، لأنّنا كلنا ثقة من إنّو بالنهاية رح تنتصر الحياة معك على الموت بالخطيِّة.

/الخوري يوسف بركات/