ببداية هالأسبوع المبارك منرفعلك يا إلهنا الحبيب كلّ التسبيح والمجد والإكرام ومنقدِّملك نهارنا تا تباركنا فيه وتبارك عائلاتنا.


يا ربّ، بدنا نشاركك بالملكوت، بس كيف ونحنا متعلقين بالدني ومغرياتا؟

بدنا نكون معك بالفرح السماوي، بس كيف ونحنا ما منستغني عن ذاتنا وملذّاتنا؟

الجواب عندك يا ربّ، إذا بدنا نشاركك ونكون معك بدنا نعاني المصير ذاتو اللي عانيتو، بدنا نواجه الإضطهادات اللي إنتَ واجهتا، بدنا نكون حُكماء ووُدعاء متل ما إنتَ كنت ونواجه كلّ الصعوبات بمحبِّة وصبر، نحنا ومتِّكلين عالروح القدس المُعزّي.


يمكن توصل فينا الإيّام نكون وحيدين متل ما إنتَ كنت، وشهادتنا للحقيقة ممكن تخسِّرنا ناس كتير متل ما صار معك يا ربّ.


وإذا بدنا نتمسَّك فيك وبالحقيقة الإنجيليِّة، ممكن نعاني الإنتقادات والرفض واللامبالاة من الآخرين وحتَّى من أقرب الناس إلنا متل ما عانيت.


رغم كلّ هودي، رح نثبت فيك وما رح نتراجع لأنّنا متأكّدين إننا مَنّا لوحدنا، إنتَ حاضر معنا وفينا يا ربّ.

/الخوري يوسف بركات/