منرفعلك كلّ التسبيح والمجد والإكرام والشكر يا ربّ عا كلّ نِعَمَك وعطاياك اللي بتفيضا علينا.


عظيم إنتَ يا الله الروح القدس، وشو منهملك بحياتنا، مع إنّو كلّ الشغل بحياتنا الروحيِّة عليك : 

إنتَ اللي بتدفعنا تا نقول الحقيقة بكلّ المواقف اللي منواجِها، إنتَ اللي بتمشّينا عا درب القداسة، إنتَ اللي بتعزّينا بالوقت اللي منكون فيه بحاجة للمسة رجاء، إنتَ اللي بتقوّينا روحيًّا وبتشدِّدنا بالوقت اللي منكون فيه بحالة إحباط، وإنتَ اللي بتساعدنا على إننا نتخطّى الصعوبات اللي بتعترضنا بحياتنا معك.


فيك يا روح الله نحنا منقوى عا سلطان الشرّير اللي بيحاول يقيِّدنا، وفيك يا روح الله منلاقي السلام الداخلي اللي ما ممكن حدا ينزعو مِنّا إذا حطّيناك القائد والربّان لسفينة حياتنا.


لهيك لمَّن منرفض حضورك بحياتنا، ومنرفض إنَّك تفوت عليها وتطرد كلّ قوى الشرّير اللي عم بتجذِّر الخطيِّة فينا، هيدا هوّي التجديف عليك، وهوّي الموت الأبدي.


لهيك نحنا منسلمك دفِّة حياتنا تا إنتَ تقودنا للملكوت.

/الخوري يوسف بركات/