شو بتفرح قلوبنا لمّن منوعا الصبح عا نهار جديد مليان من نورك يا إلهنا ومخلِّصنا الحبيب.


يا ربّ، بكتير من الأوقات ، وبظلّ هالأوضاع الصعبة اللي عم نمرق فيا، وبين كلّ عواصف هالعالم وتجاربو، منحسّ بإننا متروكين، متل ما حسّو هالتلاميذ بالبُحَيرة وقت العاصفة.


بس بين كلّ هالعواصف، بتبقى وحدك يا ربّ سهران علينا، ولمَّن منتعب ومنستنزف كلّ قوّتنا وما بيعيد فينا نتحمَّل ومنحسّ بالهلاك، بتجي يا يسوع تا تبدِّد عنّا ليل الظلمة وبتسكِّت أمواج الموت.


وَحدا القيامة معك يا إلهنا الغالي بتعطينا الراحة وبتخلّينا ننتصر عالشرّ بالحبّ، وعالتجارب بالإيمان فيك، وعالظلمة بنورك، وعالحقد بالتسامح والمغفرة.


تعا يا ربّ وقوّينا وشدِّدنا فيك، وكون قائد سفينة حياتنا، ونحنا كلّنا إيمان بإنّو معك رح نوصل لميناء الأمان ونُعبُر هالحياة الفانية تا نستقرّ فيك.

/الخوري يوسف بركات/