كلّ يوم منفتح عيوننا فيه عا نهار جديد يا ربّ، منلاقي الطبيعة كِلّا بتمجّدك بألوانا، ومنشكرك عا حضورك معنا.


اليوم عم نشوف حالنا واقفين مع الناس اللي متجمّعين حواليك يا ربّي يسوع تا نستقبل كلامك متل ما بتستقبل الأرض حبِّة القمح.


حبِّة القمح هيّي إنتَ يا ربّ، ودورنا إننا نتفاعل معك متل الأرض الصالحة تا نقدر نعطي ثمار حُبّ وسلام وفرح معك ومع كلّ اللي منلتقي فيون.


بس في تجارب كتيرة عم تعترض علاقتنا فيك، وخصوصي بهالوقت اللي عم منعيشو ببلدنا وبالعالم يا ربّ وأهمّا الإستسلام لهموم الدني ومُغرياتا.


بس حُبَّك يا ربّ وحدو اللي بيخلّينا نوعا عا أهمّيتَك بحياتنا، وعا مركزنا بقلبك اللي انجرح وانطعن عالصليب كرمال خلاصنا.


لهيك منقدِّملَك حياتنا تا تِتِّحد بحياتك ونكون شهود حُبّ للعالم.

/الخوري يوسف بركات/