ببداية هالأسبوع المبارك منرفعلك يا ربّي يسوع أناشيد الشكر عا هالنور اللي بتشرقو علينا من نورك العظيم.


لمّن إجا بعض اليونانيّين لعند فيليبُّس وسألوه إنُّن بدُّن يشوفوك، كانو عم بيفتّشو عنَّك لأنُّن بحاجة لإلك تا تعطيون الحياة لأنَّك إنتَ نبع الحياة.


هاليونانيّين اللي طلبو من فيليبُّس إنُّن يشوفوك لأنُّن بدُّن يغرفو من نبع حُبَّك اللي سكبتو عالبشريِّة مغفرة من دون حدود وقت كنت عالصليب.


هيدا هوّي المجد الحقيقي اللي دعيتنا إننا نعيشو حقَّقتو بِحُبَّك اللامتناهي، هيدا هوّي المجد الحقيقي المجبول بالخدمة الصادقة تجاه كلّ مين بحاجة لإلنا.


مجدك يا ربّ ما بيرتكز عالغنى وحُبّ المال، ولا عالتسلُّط والفوقيِّة، ولا عالجشع والكراهية، ولا عالأنانيِّة وحُبّ الذات.


مجدك يا ربّ بينبنى عالتواضع والمحبِّة والمغفرة وعالفرح بالعطاء المجَّاني.


يا ربّي يسوع، حياتنا ما إلها معنى من دونك، نحنا اللي حاطّينك هدف وغاية حياتنا، ومن دون حُبَّك منعيش الجوع والعطش الحقيقي.

ملّينا من حُبَّك يا ربّ.

/الخوري يوسف بركات/