اليوم صبحيِّتنا معك يا روح الله القدّوس، الأقنوم التالت من الثالوث، المنسي من أغلبيِّتنا.


يا روح الله القدّوس، كتير منحكي عن الله الآب وكتير منخبّر عن الله الإبن، بس قليل كتير تا نحكي عنَّك أو معك، ونتأمَّل فيك وبحضورك الخفيّ معنا، إنتَ المُعَزّي والصديق والسند بكل وقت منطلبك فيه.


يا روح الله القدّوس، إنتَ النور اللي بتنوِّرلنا طريقنا بظلمة هالعالم، إنتَ النار اللي بتطهِّرنا وبتنقِّي قلوبنا من كلّ روح شرّ.

يا روح الله القدّوس، إنتَ الريح الناعمة، والنسيم العليل اللي بيخلّينا نتلمَّس حضور الله الناعم بحياتنا، وإنت العاصفة اللي بتحمل بِقُوِّتا كلّ شي بيبعدنا عن الربّ.


تعا يا روح الله القدّوس، روح الحقّ، واشتغل فينا واسكن بقلوبنا وعقولنا وعرِّفنا طريق الملكوت.

/الخوري يوسف بركات/