بصباح هالنهار المبارك، منرفعلك كلّ التسبيح والمجد والإكرام يا إله المحبِّة والفرح والسلام، يسوع المسيح.


يا ربّ، مش عم نقدِّر، ولا حتَّى عم نفكِّر نقدِّر قيمة هالكنز اللي عاطينا ياه، الكنز الأغلى واللي هوّي الحياة.


وهالحياة ما رح يكون إلها طعمة ولا رح نفهما إلّا لحظة اللي منستحقّا، بالوقت اللي بدنا نعبر فيها من هالعالم الزايل المليان صعوبات وملذّات للعالم التاني.


ومنسأل حالنا يا ربّ، نحنا اللي منعترف فيك إلهنا ومُخلِّصنا الوحيد : شو رح ناخد معنا من كلّ اللي منملكو بهالدني؟ 

والجواب منعرفو كمان : ما في غير أعمالنا عشناه بيرضي قلب الربّ.

بحياتنا، يا ربّ، في جهل عم يعمينا وما عم بيخلينا نشوفك بالآخرين.

جهل عن طريقة حُبّنا لإلك عم بيخلينا نتمسَّك بالأرضيَّات ونفضِّلا عليك.

جهل عن معرفتنا كيف بدنا نحبَّك واللي عم بيخلّينا نحبّ ذاتنا ونحبّ المادِّة.

جهل عم بيخلّينا نكره بعضنا البعض بسبب قطعة أرض أو شي ميراث معيَّن.


إنتَ كنزنا الوحيد يا ربّي يسوع وما بدنا غيرك كنوز.

/الخوري يوسف بركات/