أجمل صباح اللي بيبدأ بإشعاع نورك، وأحلى صبحيِّة مع كلامك اللي بيغلغِل بقلوبنا يا ربّي يسوع.


يا ربّ الكرم، إنتَ اللي زرعت كلّ واحد وواحدة مِنّا تينة، بكرم هالعالم، تا نثمر ثمار تليق فيك وبِحُبَّك اللي حبَّيتنا ياه وكان الملء عالصليب.


يا ربّ الكرم، نحنا، هالتينة اللي زرعتا بهالعالم، رح نسعى، بكلّ ما اعطيتنا ياه مِن نِعَم ومواهب، إننا نِثمُر حياة إلهيِّة متجلّاية بأعمالنا الصالحة اللي بتمجِّد إسمك.


يا ربّ الكرم، والبيّ الحنون اللي دايماً بتتركلنا المجال إننا نتوب ونرجع نشتغل عا ذاتنا تا ترجعلنا الكرامة البنويِّة تجاهك واللي خسرناها بفِعل أنانيَّاتنا وكراهيَّاتنا لبعضنا البعض، رح نبقى عم نجاهد الجهاد الصادق تا نكون مستعدّين للقاءك بالفرح الأبدي معك.

بس يا ربّ الكرم، بكتير من الأوقات عم نكون ناشفين وقاحلين، ما منعطي ثمار لحياتنا الروحيِّة ومستحقّين الفصل عن السعادة الأبديِّة.


مسؤوليَّتنا كبيرة يا ربّ، وحُبَّك ورحمتك بيخلّونا مستعدين إننا نُعطي ثِمار بتليق فيك.

/الخوري يوسف بركات/