بهالصباح المبارك، منرفعلك يا ربّ عيوننا وأفكارنا وقلوبنا فعل تسبيح وشكر عا كلّ نِعَمَك وعطاياك اللي بتفيضا ورح تفيضا علينا بهالنهار المجيد.


يا ربّي يسوع، إنتَ اللي تركت مجد السما وجيت لعنّا، عا أرضنا وصُرت مِنّا، تا تفتِّش عن الخروف اللي ضاع بمتاهات هالعالم الزايل، ليش ما فينا نحنا كمان نبادلك هالفعل ونترك مجدنا الباطل ونفتِّش كيف بدنا نرجع لعندك ونحاول إننا نعيش مجدك عا عهالأرض؟


يا ربّي يسوع، كلّ واحد وواحدة مِنّا، بمرحلة معيَّنة من مراحل حياتنا، منضيع بمتاهات هالحياة، وهلَّق بحاجة لإلك، لهيك منشوفك عم تترك الـ ٩٩ وتركض تا تخلِّصنا بصليبك المُحيي وغافر الذنوب.


يا ربّي يسوع، ما رح نقدر نفهم هالحب العظيم اللي حبَّيتنا ياه إلّا لمَّن منشوفك تحمَّلِت كرمالنا الجلد والصلب والموت تا تعطينا الحياة بملئها.


نحنا اليوم عم نطلُب مِنَّك يا ربّ إنَّك تعلِّمنا كيف نتخطّى ضعفنا البشريّ تا نقدر، بدورنا نحِبّ إخوتنا متل ما إنتَ حبَّيتنا.

/الخوري يوسف بركات/