بهالصباح المبارك، كلّ الخلايق بترفعلك التسبيح يا ربّ، والسما والأرض بتمجّدك يا إله الآلهة.

شو حلوة هالثقة اللي بتعطيها لولادك يا ربّ، متل ما عمل هالملك مع عبيدو.

وشو مهمِّة هالمساواة اللي بتساوينا فيها مع بعض بالمحبِّة كأبناء وبنات الملكوت، متل ما ساوى هالملك عبيدو لمَّن عطاهن كلّ واحد مِنُّن عشر دنانير تا يتاجرو فيهن.

عظيم إنتَ يا ربّ، بتعطينا مواهب ونِعَم وعطايا ما عم نعرف قيمتن، ولا عم نعرف نستثمرُن أفعال محبِّة ورحمة وسلام بمجتمعنا اللي خلقتنا فيه تا نمجّدك بزيادة هالمواهب وتوزيعا عا كل إنسان بحاجة لعنايتك ورحمتك، ونكون نحنا إيدك وسندك لكل العالم.

يا ربّي يسوع، هدفنا نكون، متل هالخادمين الأوَّلَين ، عم نتفاعل مع إرادتك وتكون هالنِعَم والمواهب عم يزيدو ويشتعلو من نار الروح القدس تا يضوّو حب وسلام.

هدفنا اليوم، وكلّ يوم يا ربّ، إننا نعرف قيمة هالعطايا، ورح نحاول نكون تلاميذ حقيقيّين لإلك، نعكس كلامك فينا وبالآخرين اللي عم نلتقي فيهن.

/الخوري يوسف بركات/