منرفعلك يا ربّ أجمل ألحان التسابيح والشكر بهالصباح المبارك اللي فيه عم بيتجلّى نورك عا كل خليقتك.


منتأمَّل اليوم يا ربّ، بكلامك اللي فيه بتدعينا كمؤمنين ومؤمنات لتبنّي حكمتك ومش حكمة العالم، وبتفتحلنا المجال على إننا ننفتح عالروح القدس وعا إرادتك، ونشتغل بحسب مشيئتك.


منتأمَّل بكلامك اليوم وكلّ يوم يا ربّ، لمَّن بتدعينا إننا نكون، كرُسُلَك وتلاميذك، قناديل بعتمة هالعالم، شمعة بتنوِّر حياة كلّ مين بيلتقي فينا.


منتأمَّل بكلامك اليوم وكلّ يوم يا ربّ، لمَّن بتدعينا إننا نعرف نعيش بُشرى الخلاص بحياتنا، ونعكِسا نور وحياة، تا حتَّى تصير سرّ ومفتاح فرحنا وسعادتنا.


منتأمَّل بكلامك اليوم وكلّ يوم يا ربّ، لمَّن بتدعينا تا نتحضَّر إننا نكون أبناء وبنات الملكوت، ونسخى بكلّ ما عطيتنا ياه من نِعَمْ ومواهب، محبِّة وأمانة، عا كلّ اللي بحاجة للمسة حنان.

نحنا يا ربّ، أبناءك وبناتك، رح نبقى ملتزمين بإننا نفعِّل كلّ المواهب اللي فينا لمجدك ولخير الكنيسة.

/الخوري يوسف بركات/