مع إطلالة هالصباح المبارك، منرفعلك يا ربّ أفواهنا قلوبنا وعقولنا وعيوننا فعل تسبيح وشكر عا كلّ نِعَمَك وعطاياك يا إلهنا الحبيب.


لمَّن منِقرا أو منسمع هالأمثلة اللي عم بتشبِّه فيها ملكوت السما يا ربّ بحبِّة الخردل وبالخميرة، ما فينا إلّا ما نحسّ حالنا ضايعين، لأنّو تفكيرنا بالقداسة غير عن تفكيرك.


وتا نقرِّب أكتر من الملكوت، لازم نكون قراب أكتر وأكتر مِنَّك يا ربّ.

وإذا بدنا نتقرَّب مِنَّك، لازم نعرفك ونغوص بأسرارك أكتر وأكتر.


وتا نعرفك أكتر، لازم نِنما فيك أكتر وأكتر، ونفوت معك بالعمق، وما نضلّ عالهامش وسطحيّين بعلاقتنا فيك يا ربّ.


بدنا نِنما بعلاقتنا فيك يا ربّ متل ما بتنما حبِّة الخردل تا تصير شجرة ونعطي ثمار ونفيّي من حُبَّك عا كِلّ إنسان.


بدنا إيماننا يقوى أكتر وأكتر متل هالخميرة اللي بتخمِّر العجينة كِلّا ونعدي الآخرين مِن حُبَّك، وهيك منكون عم نِتِّحد فيك ونِعكُس صورتك للعالم.

/الخوري يوسف يركات/