قدَّيشو حبّ الذَّات قوي بهالعالم يا ربّي يسوع، ووصل الشرّ بالناس لدرجة إنّو بلبل عقولن وضمايِرُن.


قدَّيش بيهِمَّك أمر تلاميذك وأبناءك وبناتك تا حذَّرتُن إنّو رح يجي وقت ويضطهدوهن الناس الغيرانة عا مصالِحا وممكن يقتلوهن معتِبرين حالُن عَم يعملو شي منيح ومقدَّس ونوع من العبادة لألله.

هيك عم بتكون حال كل حدا عطاك ذاتو بصدق وأمانة.


وهيدي هيِّي حالة كلّ إنسان مِنَّا حطَّك الهدف الأوَّل والوحيد وعم يِسعى إنّو يعيش عا أساس يُرضي قلبك ويتنعَّم بسلامك.


بهالمعركة والصراع الدايمين بحياتنا الروحيِّة أوَّلاً والإجتماعيِّة تانياً، ما منقدر نضلّ واقفين عا إجرينا من دون روحك القدّوس يا ربّ اللي حاضر تا ينجِّينا من كلّ التجارب حتَّى إذا إجِت ساعة التجربة يكون عم يساعدنا تا ما نختار الطريق الهيِّن ونضَيِّع الطريق ونبعد عنَّك يا ربّ.


تعا يا روح الله ورافقنا بدربنا صوب للربّ.

/الخوري يوسف بركات/