منرفعلك يا ربّ كلّ التسبيح والمجد بصباح هالنهار المبارك، ومنشكرك عا كل نعمك وعطاياك.


لمَّن منقرا أو منسمع الأمثلة اللي بتحكينا فيها يا ربّ عن المغفرة، منصير نفكِّر كيف بدنا ننصح غيرنا اللي ما عم يغفر، ومنصير نفتِّش بالإنجيل عن كلامك اللي بيدعي للمغفرة، ومننسى حالنا وبتبقى مشاكلنا مع إخوتنا، وما منسمح لحدا يحكينا عن المغفرة.


بس لمَّن منشوف قدَّيش كان رحوم هالملك تا شال كلّ ديون عبدو، ما فينا إلّا ما نتأمَّل ونتأكَّد من رحمتك وحُبَّك اللي خلّوك تنزل عا أرضنا، وتلبس إنسانيِّتنا وتتألَّم وتموت كرمالنا تا تمحي خطايانا وترفعنا بقيامتك لعند الآب السماوي.


ولمَّن منشوف قساوة قلب اللي ما صبر عا رفيقو رغم مناجاتو، ما فينا إلّا ما نلوم حالنا عا كلّ لحظة مش عم نغفر فيها لكلّ اللي إذيونا.


وتا نقدر نحصل عا غفرانك يا ربّ ما فينا إلّا ما نغفر لإخوتنا ونعمل بحسب كلامك يا ربّ.

/الخوري يوسف بركات/