مع كلّ القدّيسين اللي بتعيِّدلن الكنيسة اليوم ، بسبّحك وبمجّدك يا ربّ السما والأرض.


ومع بطرس صخرة الكنيسة والرُسُل بعظِّم إسمك بحياتي يا ربّي يسوع، يا إبن الله الحيّ.


بحاول إتشبَّه بكلّ إنسان عاش القداسة هوّي وعم يعلُن إسمَك بكلّ تفاصيل حياتو.


بحاول إقتدي بكلّ الشُّهَدا اللي ثبتو بإيمانُن هنّي وعم يستشهدو حُبًّا فيك يا يسوع.

بحاول إتمسَّك بإيماني فيك متل ما عِملو آباءنا وأهلنا اللي سبقونا لعندك.

ورغم كلّ هالمحاولات بتضلّ التجربة والخطيِّة ناطرتنا عند كلّ موقف إيماني بدنا ناخدو، وهيّي بدورا بتحاول وبتحاول، وكتير أوقات بتنجح، إنّها تمتلكنا وتبعِّدنا عنَّك.

بحبّ، ورح إشتغل عا ذاتي، اليوم وكلّ يوم، إنّي إستحقّ الطوبى، وأوصل لعندك، يا ربّ، وإسمعك عم بتقلّي :

تتهنّى بالسما لأنَّك إستحقَّيت، من خلال حياتك عالأرض، إنَّك تكون فيها وتتنعَّم مع كلّ القدّيسين بالملكوت الأبدي.

/الخوري يوسف بركات/