منرفعلك يا ربّي يسوع، بختام هالأسبوع المبارك، كلّ التسبيح والمجد والإكرام عا حُبَّك اللامتناهي لإلنا.


يا ربّ، بمثل الكرّامين القتلة بالإنجيل اليوم بتفرجينا قدَّيش أو لأيّ حدّ بتوصل فينا الأنانيِّة، ومنصير نقتلك يا إلهنا بحياتنا، ومنعتبر إنّو هيك منكون عم نسخِّر كلّ شي لخدمتنا وخدمة رغباتنا بعيد عنك يا ربّ.


يا يسوعنا الحبيب، إنتَ اللي عطيتنا الوزنات، والعطايا تا نوظِّفا بمجتمعنا بطريقة نمجّدك فيا وما نمجِّد أنفسنا، ونكون بخدمة الكنيسة والمجتمع، ونتخلَّص من الأنانيِّة والتشاوف، ورح نسعى تا نبلّش نعمل بحسب قلبك بكرمك يا ربّ.


قدَّيش عم نكون متل هالكرّامين القتلة، عم نقتل صوتك اللي بيدعينا تا نحب؟


قدَّيش من الأوقات ما عم نقبل كلمة مِنَّك بتدعينا فيها تا نحب ونغفر حبا فيك؟


شو حلوة نوقف وقفة اليوم معك ومع ذاتنا يا ربّ، وقفة مليانة ثقة، نقصد فيها إننا نخدم الكنيسة والمجتمع والبيئة اللي عايشين فيا، بكلّ محبِّة تجاهك وتجاه أخوتنا.

/الخوري يوسف بركات/