مع بداية زمن التهيأة، وبالأسبوع اللي عم نتحضَّر فيه ككنيسة واحدة لنتجدَّد ونتقدَّس فيك يا ربّ، منرفعلك قلوبنا وأفكارنا وعقولنا فعل تسبيح وتمجيد.


يا يسوعنا الحبيب، إنتَ بتعرف كلّ واحد وواحدة مِنّا على حقيقتنا.


بتعرف إننا بوقت الشدِّة في كتير أوقات منضعف ومنوقع، بس إنتَ دايماً حاضر يا ربّ على إنَّك تساعدنا بمجرَّد ما نسلّمك ذاتنا بكلّ صدق وأمانة.


يا يسوعنا الحبيب، إنتَ اللي تجسَّدت وجيت تا تخلِّص العالم وكلّ واحد وواحدة مِنّا شخصيًّا، بالرغم من الأنانيِّة والكبريا والحسد والنميمة المنتشرين بين الناس.


يا يسوعنا الحبيب، إنتَ إلهنا اللي جيت عا عالمنا، عالم الحقد والكراهية والتسلُّط، تا تعلِّمنا، إنتَ الملك المتواضع والإله الحنون، إنّو المركز والسلطة هنّي خدمة، وإنّو بالتواضع وبالمحبِّة منقدر نملك، بإسمك، عا قلوب كتيرة ونوَصِّلن لعندك.

نعم يا ربّ، بدنا نحاول، بإيمان صادق، إننا نعيش متل ما إنتَ بتريد وبتحب.

/الخوري يوسف بركات/