بصباح هالنهار المبارك، منسبّحك ومنمجّدك ومنباركك ومنعظّمك يا إله السما والأرض ، ومنشكرك عا محبّتك اللامتناهية لإلنا.


منشكرك يا خالقنا، لأنَّك حبَّيتنا حُبّ ما إلو حدود، لدرجة إنَّك بذلت إبنك الوحيد، ربنا يسوع المسيح، تا تكون لإلنا، نحنا اللي منآمن فيك ومنعمل بحسب مشيئتك، الحياة الأبديِّة.


منشكرك يا ربّنا يسوع اللي تجسَّدِت بأرضنا وصُرت إنسان متلنا، وشابهتنا بإنسانيِّتنا ما عدا الخطيِّة، وبالأخير إفتديتنا عالصليب حُبًّا فينا وتا نعرف قيمة هالنعمة اللي نحنا فيها إننا مسيحيِّين مدعوّين تا نتشبَّه فيك.

منشكرك يا روح الله القدّوس، أجمل هديِّة تركلنا ياها الله بالحياة، لأنَّك دايماً حاضر وناطر تا نستنجد فيك كلّ ما بتقوى علينا التجارب والصعوبات.


نحنا أبناءك يا ربّ، أبناء الملكوت، ومش أبناء هالعالم الزايل، ولو عايشين فيه.


عم نسعى تا ما نفكِّر تفكير هالعالم المبني عالبغض والكذب والخطيِّة، ونفكِّر بحسب هويِّتنا اللي بتدعينا للمحبِّة والمسامحة.

/الخوري يوسف بركات/