كلّ يوم بيشرق فيه نورك علينا يا ربّ، بتشرق البسمة والفرحة بقلوبنا، وكلّ ما بيِجي الليل بيقوى الرجا فينا إنَّك ما بتتركنا للظلمة والعتمة يا إلهنا الحببب.

كتير من الأوقات ، وخصوصي لمَّن منكون متضايقين، منصير نطلب مِنَّك يا ربّ، الآيات والعجايب تا نتأكَّد من وجودك معنا، ومننسى إنّو أجمل آية بتدلّ عا حضورك هيّي نحنا، كلّ واحد وواحدة مِنّا.

خليقتك يا ربّ هيّي أجمل الآيات.

ما فينا نتطلَّع بجمالات الطبيعة، من الجبال للوديان للأنهار تا نوصل للحيوانات بكلّ أنواعا، إلّا ما نمجّدك ونآمِن بحضورك، لأنّو ما مُمكِن حدا يقدر يخلق هيك عجايب بهالدقّة غيرك يا إلهنا الحبيب.

وكل إنسان بهالكون بيآمن إنّو فيه ميِّزات طبيعيِّة وبيولوجيِّة وفكريِّة بتكوِّن أجمل الآيات اللي بتثبت وبتدلّ عا حضورك بهالعالم، بيشكرك وبيمجّدك يا ربّ.

/الخوري يوسف بركات/