منرفعلك يا ربّ كلّ التسبيح والمجد والسجود والحمد والإكرام عا كِلّ إنعاماتك علينا.

شو هيِّن الحُكم عالناس يا ربّ بإنُّن ما بيعرفوك، متل ما كانو اليهود شايفين بحالن إنُّن وحدُن شعب الله المختار و وحدُن اللي بينالو الخلاص.

هيدا حالنا نحنا يا ربّ، منفكِّر إننا وحدنا منعرفك ومنصير ندين غيرنا اللي عم يخطي متل كأننا نحنا اللي عَنّا القدرة على التمييز بين الخير والشرّ، ونصنِّف الناس بالخانات عا ذوقنا.

بس نحنا مش عارفين إننا بتصنيفنا للناس هيك منكون عم ندين حالنا لأننا مننسى إننا منتصرَّف مِتلُن وأسوأ أوقات و إنّو كِلنا متساويين بنظرك يا ربّ و إنّو الكلّ مدعو إنّو يتعرَّف عليك ويفوت معك بعلاقة حُبّ متبادل.

وحدك يا ربّ عندك سلطان الحُكم، وروحك القدّوس هوّي الصديق الوحيد اللي بينصحنا تا ما نحكُم عا حدا ونعيش المحبِّة تجاه كلّ إنسان من دون أحكام.

/الخوري يوسف بركات/