منرفعلك يا ربّ كلّ التسبيح والمجد والإكرام بصباح هالنهار المبارك يا ربّ السما والأرض.


كلامك يا ربّي يسوع هوّي كلام فيه نور وحياة.


إنتَ الحقّ الجايي عالعالم حتَّى يعرف كلّ إنسان إنّو الحقيقة صارت إنسان وتجسَّدِت بيناتنا.


والحياة ما بتحلى إلّا فيك يا يسوع، إنتَ النبع اللي بيعطي الحياة لكلّ مين بيطلبا وخاصَّةً اللي بيعيش بحسب كلامك.

في موت واحد يا ربّ، هوّي الإنفصال عنَّك.

الموت الجسدي بدّو يصير عاجِلاً أم آجِلاً، بس اللي بيكون مسلِّم ذاتو لإلك يا يسوع بيصير موتو الجسدي عبور للحياة الأبديِّة معك.

وهيدا اللي منتمنّاه ومنطلبو بحياتنا هون عا هالأرض، إنّو نحفظ كلمتك، ونحافظ عالعلاقة الحقيقيِّة اللي بتربطنا فيك كأبناء وبنات إلَك يا ربّ، ونجسِّد كلامك بحياتنا تا تصير إنتَ حيّ فينا ونصير نحنا كمان أحياء فيك.

/الخوري يوسف بركات/