منقدِّملك يا ربّ، بصباح هالنهار المبارك، أعذب ألحان التسبيح، ومنشكرك عا حُبَّك اللامتناهي يا إلهنا الحبيب.


يا ربّنا يسوع المسيح، قبل ما يتكوَّن إبراهيم، وحتَّى قبل ما يِخلَق قبلو آدم وحوا، إنت موجود ورح تبقى موجود وحاضر لأنّك إنتَ الله الأبدي والأزلي.


يا يسوعنا الحبيب، إنتَ ، لكلّ إنسان مؤمن فيك، الملجأ الوحيد اللي منلجألو لمَّن منكون موجوعين تا نلاقي عندك الدوا، عطشانين تا نلاقي فيك الإرتواء والإنتعاش، ضايعين بأخد القرارات المهمِّة، تا نلاقي فيك المرجع والسند القوي لكلّ القرارات الحكيمة والسليمة اللي لازم ناخِدا بحياتنا.


يا حبيب قلوبنا، كيف ما بدنا نحبَّك ونموت بِحُبَّك، إنتَ اللي حبَّيتنا وجيت لعنّا، عا أرضنا، وصرت واحد مِنّا تا ترفعنا معك لعندك بالمجد الأبدي؟


بس كمان نحنا عنّا دور مهمّ كتير بيحدِّد مركزنا بالسما أو لا، وهوّي إننا نِقبل نغيِّر من تصرُّفاتنا اللي ما بتليق فيك، ونِلبُس الروح القدس تا نصير شبيهين فيك.

/الخوري يوسف بركات/